وأنا قاعده دلوقتي جه فدماغي مواقف كتير جدا غريبه
مش لاقيالها تفسير منطقي
الايام اللي فاتو دول حصل حاجات كتيييييييييييير وحشه
وبعدها حصل حاجات كتيييييييييييييير برده حلوه
وبين الاتنين انا فوضت أمري لله
هو اللي بيحس بعباده
ومش بينساهم أبدا
أتعلمت حاجه صغنططه جدا في فتره من حياتي ...إن الناس ما بتعملش حاجه لبعض
الناس بتزود الهم
وإن الشكوي لغير الله مزله
بقيت بحاول ما أتكلمش مع حد
بس برده الطبع بيبقي غالب
لما بتخنق معايا شويه بجري علي اكتر القلوب اللي بستريح معاهم وأحكيلها
في الفتره اللي فالايام اللي فاتت دي ما كانش قدامي أي شئ غير إني اقول فوضت أمري إليك يا رب
اللي بستغرب له بقي فكل ده وجهه النظر الغريبه اللي دايما أسمعها من بابا وماما
واللي تقريبا سبب كتابتي للبوست ده
إن أنا فكلامي مع ماما وبابا
وأنا بقولهم أني مفوضه أمري لله
أنه زي ما ريحّني قبل كده وريّح قلبي
هيريحّني المره دي
يقوموا يردو عليا رد غريب جدا
اولا يضحكو
وبعدين يقوموا قايلين
أنت غريبه اوي يا مي
يعني أنت ما بتصليش وما بتركعيهاش
ويوم ما يحصلك حاجه حلوه تقولي كله عشان فوضت امري لله
طيب اركعيها
سمعت الرد ده واستغربت جدا واتحرق دمي
يمكن انا صحيح مش بواظب عالصلاه
ومش زي ما ماما دايما تستفزني وتقولي انتي يا بنتي بتكرهي الصلاه
أنا ما بكونش سعيده وفأسعد أوقاتي غير فالايام اللي بواظب فيها عالصلاه
انا بقي رديت وقولت بيني وبين نفسي
هو ربنا بيصد عبده اللي بيحتاجله
ربنا أعلم بالنفوس
وأعلم مين المؤمن ومين لأ
وكل واحد عارف علاقته بربه أيه
مش من حق أي حد فالدنيا يجي ويقيمها له
وكمان يقوله أن ربنا مش هيقبل دعائه
طيب علي اي أساس حضرتك تحط نفسك مكان الله عز وجل وتقيم علاقتي بربنا وكمان تقولي هيقبل ولا لأ دعائي
وعلي الرغم من ده كله ومن كل الكلام ده
أني الحمد لله دايما حاسه ان ربنا راضي عني
وبيحبني
ده احساس دايما جوايا
والحمد لله ربنا ما بيصد عبد بيلجأ له أبدا
الحمد لله خرجت من المشكله اللي أنا فيها
وبمنتهي السهوله ومن عنده هو _عز وجل _الحمد لله
No comments:
Post a Comment