النهارده وانا ماشيه مع نور جت سيره اعياد الميلاد
فافتكرت عيد ميلادي وانه خلاص يعني مش فاضل عليه كتير اوي
بس بيني وبينكم اضايقت واتمنيت انه ما يجيش او يعني ماحدش يحتفل بيه زي كل سنه
المهم الزعل ده بان علي وشي اوي
فنور سألتني مالك يا بنتي
المهم كنت انا اساسا مضايقه وعايزه اتكلم مع حد
لاقيتني بقولها اني افتكرت عيد ميلادي ونفسي محدش يحتفل بيه
ونفسي يعدي كده زي اي يوم عادي
فقالتلي ليه كده يا بنتي ليه خير
وزعلت اوي وقالتلي ليه
ده اليوم ده بيبقي احلي يوم عند الواحد
فقولتلها اني بفكر كده مش علشان حاجه والله غير اني ما اضايقش الناس اللي عايزه تفرحني
فهي استغربت وقالتلي ليه ...وازاي
وقولتلها اني الايام دي حاسه بحاله غريبه اوي خاصه فالبيت
وقولتلها فاكره يا نور لما كنت ببقي مضايقه ولا حاجه وتقوليلي فكيها فقوللك انا بمجرد ما بروح البيت واقعد ما اخواتي بنسي كل حاجه
وانهم بنسوني كل حاجه
قالتلي اه فاكره
قولتلها اهه انا دلوقتي مش حاسه بكده خالص وما بقتش كده اساسا
بقيت حاسه اني عايشه وسطهم ووسط غيرهم فعالم تاني خالص
بقعد معاهم بجسمي بس مش حاسه بأي حاجه بتحصل حواليا
وقولتلها اني حاسه بجد بأحساس غريب
قالتلي ايه ؟
فقولتلها اني حاسه وكأني عايشه في فصندوق ازاز والازاز ده عازل كمان للصوت فوسط الدنيا دي كلها
وعايشه فالصندوق ده ولا سامعه حد ولا حاسه بحد
وما عادش حد حاسس بيا ولا سامعني
كل التواصل اللي بيني وبينهم هو اننا شايفين بعض وبس
وقولتلها لو ان حد عمل ليا عيد ميلاد والمفروض انه بيعمل كل ده علشان افرح
هيعمله ليا وانا فحالتي دي ومش هقدر احس بيهم وبفرحتهم ولا هعرف اتفاعل معاهم من ورا الازاز ده
وانا بجد حطيت نفسي مكانهم لو اني عايزه افرح حد وبعمله كل حاجه تفرحه وانا متوقعه انه يفرح وفالاخر مايفرحش فانا هزعل جدا
وانا بجد مش عايزه ازعلهم وهم عايزين يفرحوني
علشان كده عايزاه يعدي زيه زي اي يوم عادي
ده ان جه اساسا
No comments:
Post a Comment